२०७७ मंसिर १९ शुक्रबार १२ : २२ : ४०

सिरहामा कटुवा बन्दुकसहित एक युवक पक्राउ

२०७७ मंसिर ६ शनिवार
सिरहामा कटुवा बन्दुकसहित एक युवक पक्राउ

६ मंसिर, काठमाडौं । सिरहामा कटुवा बन्दुकसहित एक युवक पक्राउ परेका छन्। आज बिहान ७ बजे औरही गाउँपालिका-५ जगदेव बाबा पोखरीमा छठ पर्व मनाइरहेको स्थानबाट एक युवक पक्राउ परेका हुन् पक्राउ पर्ने युवक सोही वडाका २२ वर्षीय रबिन दास हुन्।

जिल्ला प्रहरी कार्यालयका प्रहरी नायब उपरीक्षक शालिग्राम शर्माका अनुसार दासले पोखरीमा आफ्ना छिमेकी ४२ वर्षीय विनोदकुमार यादवलाई बन्दुकले ताकेका थिए। ‘छठ पर्वको पुजा भइरहेको ठाउँमा उनीहरू दुबैबीच वादविवाद हुन्छ। केहीबेरपछि दासले बन्दुक निकालेर यादवको कञ्चटमा ताक्छन्,’ प्रहरी नायब उपरीक्षक शर्माले भने।

प्रहरीका अनुसार उनीहरूबीच व्यक्तिगत दुश्मनी थियो। त्यहाँ स्थानीयहरू सूर्यलाई अर्घ्य दिइरहेका थिए। बन्दुक ताकेको स्थानीयले देखेपछि प्रहरीलाई खबर गरेका थिए। प्रहरीले उनलाई पोखरीबाट नियन्त्रणमा लिएको छ। बन्दुकमा एक राउन्ड गोली लोड भएको अवस्थामा बरामद भएको शर्माले बताए। प्रहरीले दासबाट अन्य दुई गोली पनि बरामद गरेको छ।