४ असोज, काठमाडौं । नेपाली सेनाका एक जवानको कोरोना संक्रमणबाट मृत्यु भएको छ । लामो समयदेखि ब्लड क्यान्सरको बिरामीसमेत रहेका रामेछाप घर भएका सैनिकको भदौ २९ गते मृत्यु भएको सैनिक प्रवक्ता सन्तोषवल्लव पौडेलले जानकारी दिए । नेपालमा कोरोना संक्रमणका कारण ज्यान गुमाउने उनी पहिलो सैनिक हुन् । उनको मृत्युपछि असोज १ गते आएको रिपोर्टमा उनलाई कोरोना संक्रमण देखिएको थियो । नेपाली सेनाका २ हजार ५६ जनालाई कोरोना संक्रमण भइसकेको सैनिक मुख्यालयले जनाएको छ ।

एजेन्सी । बेलायती सरकारले सेल्फ आइसोलेशनको आदेशलाई तोड्ने आफ्ना नागरिकलाई १० हजार पाउन्ड जरिवाना तोक्ने भएको छ । सेप्टेम्बर २८ तारिख यता कोरोनाभाइरसद्वारा संक्रमित व्यक्तिहरु र संक्रमितको नजिकको सम्पर्कमा रहेका व्यक्तिहरु सेल्फ आइसोलेशनमा बस्नुपर्ने नियम तोकिएको छ । नयाँ सुरक्षाको सावधानीमा कम आय श्रोत भएकालाई एकपटकका लागि ५ सय पाउन्डको आर्थिक सहयोग दिने जनाइएको छ । कोरोनाभाइरस संक्रमितको संख्यामा लगातार वृद्धि हुन थालेपछि बेलायती प्रधानमन्त्री बोरिस जोनसनले यस्ता कडा नियम लागू गरेका हुन् ।